مقتطـفات من الحـلقـه الســابقـــة : ...
"" محمد وهو داخل لاحظ ان الامن بتاع الكازينو ركز مع البنطلون وانوش شافته وكانت مسخسخه من الضحك ومش قادره تتكلم اصلا"
محمد : فرحانه اوى ياختـى طيب انا همشى
انوش : خلاص خلاص اقعد .. تشـرب ايه
محمد : مش عاوز منك حاجه انا هاخد من الراجل الكريم الجميل اللى جاى علينا ده
الجرسون : تأمروا بأيه حضراتكم
انوش : انا هاخد عصير مانجه
محمد : وانا هاخد قهوة دوبل
الجرسون : اوكـ يافندمـ
" محمد بص لانوش بغيظ بعد ما الجرسون مشـى وقالـها "
ـــــــــــــــــــــــــــــــــــــــــــــــــــــــــــــــــــــــــــــــ
انوش : مالك يابنـى فى ايه بتبصلى كده ليه
محمد : على فكرة المفروض وانا معاكى متكلميش حد ولا تردى على حد
وانا اللى ارد عليه مش انتى
انوش : خلاص معلش حقك عليا بس انا مش واخده على كده فـ مخدتش بالى ... خلاص بقا
محمد : معلش مش واخده على كده بس تتعودى من دلوقتى ع كده .. اتفقنا
انوش : خلاص بقا يا واد حقك عليا قولتلك متزعلش
"" محمد بصلها كده وعينه منوره وكان ناقصله دقيقه ويطلع قلوب حمرا من دماغه ""
محمد : قولى يا واد كده تانى ... يخربيت رقتك .. الكلام بيخرج منك حلو اوى يابت كده ليه
انوش : خلاص عشان بتكسفنى ... وبعدين تعالى هنا احنا مش اتفقنا انك هتبطل القهوة ومش هتشربها
محمد : لا احنا اتفقنا ان انا هخفف من شربها وبعدين انا اشربها قدامك احسن ولا اشربها من وراكــى ؟؟
انوش : ماشى ياعم اللمض ياللى انا مش هعرف اغلبك فى اى كلمه اقولها
محمد : على فكرة سهل جداً انك تغلبينى
انوش : ازاى بقا ياعم المتفائل انت
محمد : قوليلى بحبك
"" انوش وشها احمر وجاب الوان وبصت فى الساعه ""
انوش : يلا يامحمد عشان متأخرش اكتر من كده وعشان نلحق نتمشى شويه كمان
محمد : حاضر .. " وينادى للجرسون عشان يدفع الحساب "
"خرجوا من الكازينو ومحمد بدأ الكلام "
محمد : نتكلم بجد شويه بقا يا حبيبتى ..
انوش : ماشى
محمد : عارفه انا مكنتش متخيل انك حلوة اوى كده ولا كنت حاسس انى هلاقيكى بالجمال ده
انا اه تخيلتك حلوة وجميله بس مش كده ولا بالرقه والاحساس والهدوء ده
كل حاجه فيكى كأنها معموله عشانى وكأنك عارفه انا بحب ايه وبقيتى كده عشان احبك انتى وبس
عارفه انا حاسس انك جزء من قلبى كان بعيد عنى عشان ميشوفش معايا كل الايام الوحشه اللى فاتت
ولما جه الوقت المناسب ربنا قرر يرجعك ليا تانى عشان نبقى قلب واحد من اول وجديد
انوش : يااااااااه كل ده ... ده انا مش عارفه اتكلم اصلاً ... عارف يامحمد .. التليفون بيخلى حاجات كتير اوى سهله
محمد : يعنى ايه
انوش : يعنى انت من ساعه ما جيت وانا مش عارفه اقولك كلمتين على بعض لكن فى التليفون بقول كل حاجه عادى ... فعلا التليفون بيخلى كل حاجه سهله
محمد : بحبك اوى "" ومسك ايدها "
انوش : "ردت بصوت واطى " وانا كمان
محمد : هييييييييييييييييييييييييييييه يالهوووووووووى اخيراً
"" انوش شافت زى سور صغنون كده بيبص ع النيل طلب انها تقعد عليه شويه
ونطت قعدت عليه وقعدوا يتكلموا وهى نازله سندت على ايد محمد بس اتكعبلت فى الجيب بتاعتها وكانت هتقع ومحمد قلبه كان هيقف مع حركتها وهى بتقع "
محمد : مش تخلى بالك يابت .. وبعدين احسن عشان مش رضيتى تخلينى اشيلك انزلك
انوش : واد انت .. اتلم
محمد : حاضر اتلميت
انوش : واد يامحمد فى كلمه مقولتهاليش من ساعه ماقعدنا مع بعض
""محمد افتكر على طول انه كان قايلها انه اول مايشوفها هيقولها كلمه اكبر من بحبك بكتيير
واتكسف لما قالتله كده وسكت ""
انوش : انطق ياخويا قولتلى عاوز اروح النيل وديتك النيل .. عاوز اروح الاهرامات وديتك الاهرامات
ابو الهول نطق وانت منطقتش هتجننـى انطق
محمد : انا بعشق كل حاجه بتعمليها .. كل نفس بتتنفسيه بعشقه عشان كان معاكى
كل كلمه بتطلع من شفايفك بعشقها لانها منك كل حاجه بتلمسيها بعشقها لانها لمست ايدك
بعشق اى حاجه تكونى انتى فيها او معاها .. بعشق كيانك
" انوش بلمت ومش عارفه ترد تقول ايه ""
محمد : اديكى تنحتى ولا هتنطقى لحد السنه الجايه وتقوليلى ابو الهول والاهرامات ياختى روحى اقعدى بعيد كده
انوش : بطل لماضه ياواد ويلا عشان نمشـى
محمد : ماتخليكى شويه معايا L
انوش : معلش ياحبيبى المرة الجايه هنقعد مع بعض اكتر ان شاء الله ... اها نسيت اقولك تباركلى
مش انا هيبقى عندى نونة صغيورة العب بيها
محمد : نهارك اسود .. ايه هيبقى عندى نونه دى يابت
انوش : يخربيتكـ .. مش اللى انت فهمته .. دى ماما حامل ^_^
محمد : اها خضيتينى ههههههههه انا قولت هاخد البت جاهزة من مجاميعه
انوش : ياواد اتلم عيب
محمد : اتلمينا
انوش : طيب يلا تعالى وصلنى بقا انت كده كده هتركب مترو تعالى وصلنى وبعدين ابقى ارجع
محمد : حاضر ياختى اتفضلى
""محمد خد شيماء ونزلوا قطعوا التزاكر ووقفوا ع الرصيف مستنيين المترو""
انوش : يارب المترو يجى بقا ... زهقت منك وعاوزة امشـى ""فى سرها .. يارب المترو ميجيش خالص نفسى اقعد معاه طول عمرى ""
محمد : يارب يجى ياختـى عشان لو جه حالا هروح معاكى لحد البيت وهجيبلك مصيببه
الا قوليلى يابت صحيح بيتكم ده بيروحولوا ازاى
انوش : بص ياسيدى انت هتنزل المحطه اللى انا هنزلها هتطلع بره تلاقى عربيه بتقول ***** هتركبها وتقوله نزلنى عن ***** هتركب عربيه تانيه بتقول *** وهتقوله نزلنى عند المـقله ..
محمد : ههههههه ساكنين فى مقله ... وبتاكلوا لب وسودانى ببلاش بقا ولا برده بتدفعوا فلوس
انوش : امشى يا واد من هنا مش عاوزاك توصلنى امشى
محمد : خلاص خلاص حقك عليا وبعدين كملى
انوش : بس ياسيدى هتدخل الشارع بعد شويه هتلاقى قهوة هتسأل اى حد قوله عاوز بيت الاستاذ ***** **** ****
هيقولوك اهو على طول
محمد : ماشـى ياختـى ... المترو جه انا هركب العربيه اللى جمب السيدات على طول وانتى اركبى السيدات
انوش : لا والنبى عاوزة اركب معاك .
محمد : شيماء " ويبصلها بصه هى فهمتها على طول ومن غير كلام كان المترو وقف
وطلعت ركبت فى عربيه السيدات "
""محمد ركب فى العربيه اللى جمبها وقعدوا يبصوا لبعض من الازاز ويكلموا بعض مسجات
لحد ماجت المحطه اللى قبل محطه شيماء قالها بعتلها مسج قالها المحطه الجايه .. هى بصتله وضحكت وهزت راسها انها عارفه ""
""جت المحطه بتاعتها ونزلوا الاتنين قعدوا مع بعض شويه ""
انوش : محمد
محمد : نعم ياست شيماء ..
انوش : انا همشى بقا عشان متأخرش وانت اول ماتوصل طمنى عليك ماشى
محمد : ماشى ياحبيبتى توصلى بالسلامه وانا هكلمك فون طول الطريق ماشى
انوش : ماشـى .. على فكرة
محمد : ايه تانى
انوش : بحبك اووووووى
محمد : يانهــــــــار ابيــــــض ابو الهول نطق ياجدعان
انوش : خلاص يامجنون اهدى اهدى انا ماشيه باى
"" مشيت انوش وكان اجمل وقت عاشته فى حياتها كلها الوقت اللى كان مع محمد ده ^_^ ""
"" وهو كان زنان وقعد يتصل بيها طول الطريق عشان يطمن عليها ولما وصلوا قعدوا يتكلموا فى اليوم ده طول الليل لحد ماطلع النهار وكل واحد فيهم راح فى النوم من كتر التعب ""
ـــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ
"" شيماء فتحت عينيها حاسه بـ جسمها كله مش قادره تحركه .. حاولت تستوعب هى فين ؟؟
ماما نايمه جمبى على كرسى ليه .. ؟؟
ايدى متعلق فيها محلول تغذيه ليه ؟؟
هو ايه اللى حصل ؟؟
وبدأت تفتكـر اللى حصل بينها وبين مامتها وافتكرت انها اغمى عليها ... بتبص على النتيجه لقيت مكتوب عليها ( الاربعاء 15 – 12 )
شيماء اتصدمت وبتكلم نفسها ""
: الاربع .. ؟ انا بقالى تلات ايام فى غيبوبه ...؟
يعنى انا مقابلتش محمد ولا قعدت معاه ؟؟
يعنى كل ده كان حلم .. اه صح انا نسيت انه كان حلم .. ومتحققش
ماهو مش كل احلامنا بتتحقق .؟
""الباب خبط مرتين شيماء ردت على اللى بيخبط انه يدخل ""
الدكتور : صباح الخير يا عروستنا وحمدا لله على سلامتك
شيماء : الله يسلمك يادكتور
الدكتور : بصى بقا ياستى انا عاوزك تقومى تغسلى وشك كده واحده واحده مع مامتك
عشان فى زيارة ليكى
شيماء : "باستغراب" زيارة . ؟ مين جاى يزورنى .. لو محمود انا مش عاوزه اشوف حد لو سمحت يادكتور قوله انى تعبانه ومش قادر حد يزورنى
الدكتور : لا يا ستى مش استاذ محمود .. استاذ محمود روح من اول يوم وقال لما تفوقى نبقى نتصل بيه واحنا لسه مكلمناهوش .
شيماء : وارجوك يادكتور متتصلش بيه .... بس مش محمود امال مين ياكتور اللى جاى يزورنى ؟؟
الدكتور : بصى هو بصراحه مش ليكى بالاخص بس هما حبه شباب حلوين جايبين معاهم حاجات حلوة وهدايا كتير اوى وعاملين زيارة للمستشفى كلها وانا بصراحه اللى طلبت منهم يزوروكى عشان يرفهوا عنك شويه ومتخافيش هيبسطوكى صدقينى
شيماء : "فى سرها . انا مفيش حاجه تبسطنى الا محمد " ماشى يادكتور خليهم يدخلوا بعد خمس دقايق
الدكتور : خلاص انا هخليهم يزوروا المريض اللى جمبك لحد ماتخلصى
شيماء : شكراً ياكتور ... ماما .. ماما .. اصحى ياماما فى ناس جايه تزورنا
الام : حبيبتى حمدا لله على سلامتك " وتاخدها فى حضنها "
شيماء : "تحضنها بـ بلادة " الله يسلمك اصحى اغسلى وشك عشان فى ناس هتزرونا
الام : مين ؟؟
شيماء : هتعرفى لما يدخلوا
" الام دخلت غسلت وشها وخرجت وشيماء دخلت غسلت وشها ولبست حاجه على شعرها وغيرت هدومها وخرجت من التواليت لقيت السرير مفروش بالورد الاحمر ومكتوب عليه مكان ماهى بتنام (( هنا تنام اميرة الورود الحمراء .. شيماء ))
ضحكت ضحكه تلقائيه على الوصف ده وفجأة لقت صوت فرقعه وحاجات كتير نازله من السقف ملونه وبلالين طايرة متلونه وحاجات حلوة اوى واغانى اشتغلت بصوت واطى على قد الاوضه بس وناس طلعت من كل ركن فى الاوضه لابسين ماسكات اطفال وعمالين يرقصوا حواليها ويضحكوا ويهيصوا وهى كانت فرحانه اوى ""
"" ومع الزحمه دى كلها فى ايد مسكتها ومن لمستها شيماء عرفت انها بنت وتجاوبت معاها بسرعه وقعدت ترقص معاهم ونسيت انها تعبانه وقعدوا يهيصوا ويلعبوا وقعدوا يغنوا مع بعض بصوت واطى ورسمولها على وشها وش قطه بالالوان وكان احساسها حلو اوى احساس طفله
كانت تايهه عن نفسها ولقيتها فى لحظه ""
"" فى وسط كل دول واحد كان مبيرقصش كان هو اللى منظم ليهم وبيقولهم يعملوا ايه كان لازم يفضل واقف ميرقصش ولا يهيص عشان يبقى واخد باله من كل التفاصيل
عشان الفرحه تكمل ... بس المرة دى مكنش واقف عشان ينظم الحمله هو كان واقف مبهور بالجمال اللى شايفه قدامه وبالرقه واحساس الطفوله المفعم بالبراءة اللى اول مرة يشوفه على بنت ... وجمال الروح والرقه وحاجات كتير اوى كانت عجباه اوى فى البنت دى وكان نفسه يعرف تفاصيل وشها اكتر وكان لازم يخلى حد يقف مكانه ""
"" مد ايده سحب واحد من اللى بيرقصوا والتانى فهم قصده بسرعه وقف مكانه وده دخل يرقص ومع كل خطوة بيخطيها كان بيقرب منها وسط الزحمه دى هى كانت واخده بالها من خطوات رجليه اللى دقيقه جداً واللى كان واضح فيها انه قاصد انه يقرب منها
كان عامل زى راقص الباليه اللى بيحسب كل تحركاته قبل ما يتحركها
لحد ماوقف قدامها وعينه جت فى عينيها هى شافت عينيه وشافت الكلام اللى فى عينيه ... هى كانت شاطرة اوى فى لغه العيون
هو اول ماشافها عينيه اتصدمت او يمكن مكنتش مصدقه اللى شايفاها ""
""هو عينيه دخلت فى صمت رهيب .. ولاول مرة فى زيارتهم لاى حد واحد منهم يقف وهو بيرقص وميتحركش هى كمان وقفت ومتحركتش وكأنهم هما الاتنين الات كهربائيه شحنها خلص ومش قادرة تتحرك
وفى اقل من لحظه كانت واقعه فى الارض ومش حاسه بالدنيا ""
""وفى اقل من لحظه كان هو شايلها حاططها ع السرير وخرج نده للدكتور خلاه يجى يكشف عليها وقال انها تعبانه عشان مبتاكلش بقالها تلات ايام فـ داخت من الرقص والهزار الكتير ده وده عادى محدش يقلق وشكرهم الدكتور جداً وطلب منهم انهم يبقوا يرجعوا تانى وقت مايحبوا
ودعالهم بالخير ع اللى بيعملوا من ادخال السعاده على قلوب المرضى
الولد اللى كان لابس ماسك اسد خد الدكتور على جمب وطلب منه ان البيانات بتاعتهم للتواصل مع المستشفى بس لكن اى مريض حب ياخد بيانات مينفعش حد ياخدها ووصى كتير على كده
والدكتور قاله انه فاهم الكلام ده ... الولد ده خد ورقه وكتب عليها وطبقها وحطها فى ايد شيماء وحلف مامتها والدكتور ان ماحدش ياخد الورقه دى من ايدها الا لما هى تقراها الاول .. وسابوها ومشيوا ""
"" عدى النهار بطئ جداً .. وفى اول ساعات الليل بدأت شيماء تفوق .. تفتكر اللى حصل ؟؟
حفله ... بلالين .. رقص .. هزار .. اغانى .. وكان فى حد هنا .....
كان فى ... ؟؟ ايه اللى فى ايدى ده ؟؟
""
مامتها ردت قبل ماهى تسأل
الام : دى ورقه كتبهالك الولد اللى كان لابس وش اسد تقريبا هو قائد المجموعه اللى كانت هنا الصبح اللى كانوا عاملينلك حفله وطلب مننا محدش يفتحها غيركـ
شيماء : طيب ممكن ياماما تجيبيلى كوباية ميه ؟؟
الام : حاضر
" شيماء تفتح الورقه باستغراب شديد .. ليه يكتبلى ورقه ويقولهم محدش يفتحه وازاى يتجرا ويحطها فى ايدى قدامهم كده .. عموما كل ده هفهمه من الورقه لما اشوفها ""
"فتحت الورقه وبدأت تقرأ"
ـــــــــــــــــــــــــــــــــــــــــــــــــــــــــــــــــــــــــــــــــ
انتهت الحلقه الرابعه هنا ونشـوفكم معانا فى الحلقه الخامسه بقا علي خير
ياريت تسيبوا كومنت تقولوا فيه رأيكم عن الحلقه
شيماء - البطله .... محمد - حبيب البطله .... الام (رقيه ) ..
.. الدكتور ... الجرسون ..... شباب الحفله وصاحب ماسك الاسد
محمود ( زوج البطله )
الرواية مـهداة لـ أمرأة لمـ تكـن موجودة من الاسـاس .. ولـ كنها كانت لـ كل شئ هـى الاساس ..
الكاتب .
+copy.jpg)
