+copy.jpg)
مـقـطـتفـات من الحـلقـه السـابـقـه
"" عدى النهار بطئ جداً .. وفى اول ساعات الليل بدأت شيماء تفوق .. تفتكر اللى حصل ؟؟
حفله ... بلالين .. رقص .. هزار .. اغانى .. وكان فى حد هنا .....
كان فى ... ؟؟ ايه اللى فى ايدى ده ؟؟
""
مامتها ردت قبل ماهى تسأل
الام : دى ورقه كتبهالك الولد اللى كان لابس وش اسد تقريبا هو قائد المجموعه اللى كانت هنا الصبح اللى كانوا عاملينلك حفله وطلب مننا محدش يفتحها غيركـ
شيماء : طيب ممكن ياماما تجيبيلى كوباية ميه ؟؟
الام : حاضر
" شيماء تفتح الورقه باستغراب شديد .. ليه يكتبلى ورقه ويقولهم محدش يفتحه وازاى يتجرا ويحطها فى ايدى قدامهم كده .. عموما كل ده هفهمه من الورقه لما اشوفها ""
"فتحت الورقه وبدأت تقرأ"
______________________________________
"" بدأت تقرا الورقه اللى فى ايديها من غير صوت""
"" وحشتينى اوى""
شيماء : مستحيل
الام : مستحيل ايه يامجنون هو مكتوب ايه فى الورقه دى
شيماء : لا ياماما مش مكتوب حاجه ده بيقولى الف سلامه عليكى بس
الام : ماشى يا شيماء انا هروح الحمام وانزل اجيب حبه حاجات وهقول للدكتور انك فوقتى عشان كان عاوزك
شيماء : ماشى يا ماما
"شيماء قعدت تفكر وتكلم نفسها""
""معقوله يعنى انا لما بصيت فى عينيه كان هو ولما مسكنى ورقصنى كان هو ولما كنت حاسه بالامان اول ماشوفتهم كان بس عشان هو موجود معايا ... انا بقالى كتير اوى مكنتش حسيت كل الحاجات اللى حسيتها وهما موجودين ... ازاى بغبائى مفهمتش انه موجود بينهم
وازاى بغبائى اضيع فرصه زى دى من ايدى .. اوووووووف"
""الدكتور يدخل عليها""
الدكتور : حمدا لله على سلامتنا عروستنا الجميله ازيك يا استاذه يا مدلعه
شيماء : هههههه مدلعه ايه بس يادكتور ده انا زعلانه اوى انى بوظت الحفله الحلوة اللى كانت هنا لما تعبت
الدكتور : طيب واللى يفرحك ويقولك انهم مستنين منى تليفون عشان يعوضوكى عنها بحـفله احسن بس بشرط
شيماء : انا موافقه ع الشرط من غير ماتقوله يادكتور ايا كان ايه
الدكتور : هههههههههههههه شكل الحفله مهمه اوى عندك طيب ياستى
فى اكل هيدخلك دلوقتى بعد ما اخرج انا هاجى بعد ماتخلصى اكل
لو لقيت باقى اكل فى الاطباق .. مفيش حفله .. اتفقنا
شيماء : خلاص وانا موافقه يادكتور مفيش حفله انا مش عاوزة الحفله دى اصلا
الدكتور : ههههههههههههههههههههه يلا بطلى دلع انا هخرج عشان تاكلى براحتك ولما اجى هتصل بيهم قدامك عشان يجوا
شيماء : ماشى يادكتور
""الدكتور خرج وبعد شوية دخلت ممرضه بـ عربيه صغيره من بتوع المستشفيات الخاصه وعليها الاكل وطبعا كان اكل كتير تعويضا عن النقص اللى فيها وهى اصلا مش بتحب تاكل كتير فـ ده كان بـمثابه عقاب ليها ""
""المهم شيماء كلت وخلصت اكلها بأعجوبه والدكتور دخل ومامتها كانت رجعت ""
الدكتور : يلا ياستى نتصل بيهم بقا عشان يجوا
الام : هتتصلوا بـمين ؟؟
شيماء : هيتصلوا بالمجموعه اللى كانت عامله حفله هنا ياماما عشان يرجعوا يعملوها تانى عشان انا وقعت المرة اللى فاتت ومتحسبتش هههههه
الام : طيب
"" الدكتور كلم الفريق وقالوا له انهم بعد ساعه هيكونوا موجودين عنده كلهم ""
"" شيماء عرفت كده وقامت دخلت الحمام غيرت هدومها وغسلت وشها وبدأت تحط ميك اب خفيف يغطى عيوب النوم الكتير اللى بدأت تظهر لون غامق تحت عينيها وعلى بشرتها عموما""
""وفى مكان تـانى ""
ـــــــــــــــــــــــــــــــــــــــــــــــــــــــــــــــــ
محمد : انا لازم اروح حتى لو كان ده هيسببلى مشاكل كتير ووجع اكتر
مصطفى : يابنى افهم انت مينفعش تروح كده وتظهر مره واحد بعد ماهى اتجوزت وخلفت .. انت كده هتكون سبب فى انها تهدم بيتها بايديها على امل انها ممكن تكون معاك وانت عارف ان ده مستحيل
محمد : ليه مستحيل .. ليه كل حاجه بنحلم بيها بتبقى مستحيله
ليه كل حاجه بنحبها بجد وبتبقى اكتر حاجه عاوزينها فى الدنيا مبتجيش وبتبقى مستحيله ... ليه الحياة كلها وقت مانحبـها تبقى مستحيله
مصطفى : بس يامحمد وحد الله كده واهدى ... انا بكلمك عشان انا خايف عليك وعليها
مينفعش يامحمد تعلقها بيك تانى .. وترجع توجعها بعد ماتسيبها تانى
انت متأكد انك كلها شهر ولا اتنين وهتبقى مجبر انك متكلمهاش تانى
فـ مينفعش توجعها تانى وانت بتحبها
انا اسف انى بقولك الكلام ده بس صدقنى ده لمصلحتك قبل مصلحتها
محمد : وانا لازم اشوفها يامصطفى لازم
مصطفى : يبقى تلبس ماسك زينا زيك ومش ماسك الاسد
المرة دى هتلبس ماسك الارنب وهتدخل وسط المجموعه مش اول واحد ولا اخر واحد ... اتفقنا ؟؟
محمد : اتفقنا يا مصطفى اتفقنا ؟؟
"" محمد كتب ورقه .... بخط سريع وتقريبا يتفهم بالعافيه عشان مصطفى مياخدش باله""
"" محمد جهز حاجاته ولبس هدومه وخد الماسك فى ايده ونزل ركب العربيه مع باقى الفريق وراحوا المستشفى ""
ـــــــــــــــــــــــــــــــــــــــــــــــــــــــــــــــــــــــــــــــــــــــــ
الاب : منه .... يا منه
منه : نعم يابابا .. حاضر ثوانى جايه
""منه تلبس روب فوق هدوم النوم وتروح لباباها تشوفه عاوز ايه ""
الاب : منه ياحبيبتى يلا روحى البسى هدومك مامتك اتصلت وقالت ان شيماء صحيت وفيه شباب هيعملولها حفله هناك .. تعالى نروح ونقعد معاهم هناك ماشى
منه : ماشى يابابا حاضر هدخل اغير هدومى بس
""تدخل منه عشان تغير هدومها وتروح لشيماء المستشفى ""
ـــــــــــــــــــــــــــــــــــــــــــــــــــــــــــــــــــــــــــــــــ
"" منه وباباها وصلوا المستـشفى وطلعوا سلموا ع شيماء وقعدوا شويه والاب خرج سلم ع الدكتور واطمن ع الحاله بتاعت بنته وانها بقت كويسه وتقدر تخرج بكره (التلات) فى اى وقت هى تحبه ""
"" الفريق وصل وقبل مايطلعوا دار بينهم الحديث ده ""
مصطفى : ياشباب .. يابنات .... النهارده اللى هيلبس ماسك الاسد انا
حركاتكم وافعالكم كلها هتاخدوها من اشاراتى انا .. ومحمد النهارده هيبقى الارنب فى وسطكم ... ومحدش يسال ليه ماشـى .. يلا اتفضلوا ع الاستراحه نغير الهدوم
"" دخلوا الاستراحه غيروا هدومهم واتفقوا انهم هيعملوا فقرة مختلفه
وفكرتها انهم هيشغلوا مقاطع كل مقطع دقيقه لموسيقى معينه وكل مقطع واحد فيهم يدخل يرقص ويهزر عليه عشان يضحكها واما المقطع يخلص يقف واللى بعده يدخل ع المقطع الجديد ""
"" بدأت اللعبه وبدأ اول مقطع وشيماء مبسوطه بس حاسه بخوف وقلق
دخل الاسد شيماء عرفت من اول مادخل انه مش محمد""
""الحيلة دى مش هتنجح مع واحد بتعشق واحد من غير ماتشوفه بتحس بيه""
"" دخل اربع ولاد وبنات وجه الدور ع الارنب انه يدخل
واول مادخل شيماء قلبها اتهز .. طبعا هو ده محمد نظرات عيونه الثابته ..
حركاته الناعمه ورجليه اللى فى طبيعته بيمشى على صوابعها بس فـ لو بيرقص اكيدد هيكون فى قمه الخفه
تركيزة الثابت عليها باستمرار دايم .. هو ده اكيد مفيش بديل""
"" خلص المقطع بتاع محمد وراح وقف وسط زمايله ولما خلصت الفقره بتاعتهم قعدوا يهزروا معاها ويقلدوا اصوات الحيوانات ويضحكوها
وفى الاخر كل واحد اداها ورده وقالها كله فى ودنها ولد وبنت
وطبعا الورد كله اتركن ع جمب الا ورده واحده فضلت فى ايدها متركنتش ""
"" مشيت الفرقه وبدأوا يتكلموا مع بعض""
الاب : هما كانوا بيقولوك ايه يا شوشو
شيماء : حاجات كتير يا بابا دول تمانيه ولا تسعه
الاب : لا تسعه مش فاكره اى حاجه خالص منهم
شيماء : لا طبعا فاكراهم كلهم
الاب : طيب ماتقوليهم بقا
شيماء : بص يابابا
الاسد قالى "الورد عمله ما بيفتح بعد مايدبل فـ من الغباء اننا نسيبه يدبل وبعدين نحاول نسقيه" انا مفهمتوش
والفيل قال " مفيش حاجه بتتعرف من شكلها .. لازم ندخل جوه كل حاجه عشان نعرفها ""
والزرافه قالتلى : " خليكى دايما فوق الكل عشان تشوفى الحقيقه بس اوعى تحسيسهم انك فوق لـ يكرهوكى "
والنحـله قالتلى : " اوقات بيبقى علينا اننا نضحى عشان غيرنا يعيش .. واوقات التضحيه دى بتوصل للموت"
والغزاله قالتلى : " سرعتك فى كل حاجه مش مفيده .. ممكن سرعتك مع عدم تفكيرك تقتلك اسرع من البرق"
والتعلب قالى : " التفكير والعقل هما اساس كل حاجه فى الدنيا
بس لازم القلب يكون ليه مكان دايما ف كل قراراتك والا هتخسرى كتير"
والتمساح قالى : " مهما كان كدبك واضح انه حقيقه ومحدش واخد باله منه فـ انتى الخسرانه فـ كل الحالات"
والفرخه قالتلى : " اوقات كتير لازم تكونى حاجه قدام الناس وحاجه تانيه من جواكى عشان تقدرى تعيشى بس لازم فى الحالتين تكونى صادقه مع نفسك
والارنب قالى : ..........
"وسكتت ومكملتش"
الاب : قالك ايه الارنب انتى جيتى تنسى فى ده
شيماء : انا منسيتش يابابا .. بس بحاول افهم
"بتبص للورده بابتسامه اللى حل اللغز""
الارنب قالى : " الورد هو رمز الحنان حتى لو دبل .. لو دورنا جواه هنلاقى مصدر السعاده الحقيقى لينا .. لو دورنا "
الاب : الشباب دول فعلا لازم يتعملهم تماثيل على كلامهم وافعالهم الجميله دى ربنا يباركلهم يارب
""شيماء لفت ايديها جوه الورده طلعت ورقه صغيره .. ضحكت بابتسامه المنتصرة وفتحت الورقه وشافت اللى فيها ""
"" نفس المكان .. نفس الميعاد .. يوم الاربع""
ـــــــــــــــــــــــــــــــــــــــــــــــــــــــــــــــــــــــــــــــــــــــــــــ
انتهت الحلقه الرابعه هنا ونشـوفكم معانا فى الحلقه الخامسه بقا علي خير
ياريت تسيبوا كومنت تقولوا فيه رأيكم عن الحلقه
شيماء - البطله .... محمد - حبيب البطله .... الام (رقيه ) ..
.. الدكتور ... الاب "مصطفى" ..... منه " اخت البطله "
مصطفى "صديق محمد حبيب البطله"
الرواية مـهداة لـ أمرأة لمـ تكـن موجودة من الاسـاس .. ولـ كنها كانت لـ كل شئ هـى الاساس ..
الكاتب .
+copy.jpg)
